Kanë përfunduar të gjitha ndeshjet e xhiros së 23-të në Superligën e Kosovës, ku sërish ka ndryshime në renditjen tabelare.

Ballkani i cili ishte lider për këtë javë, sot u mposht nga Llapi në Podujevë me rezultat 2-0, dhe e ka humbur lidershipin, shkruan Arbresh.info.

Fitore të madhe ka shënuar Drita, e cila e mposhti të shtunën Prishtinën e Re me rezultat 3-0, triumf ky që e kthen në krye të tabelës.

Prishtina ka pësuar disfatë të rëndë në udhëtim tek Malisheva me rezultat 3-0. Fitore e madhe e Malishevës e cila hyn fuqishëm në garë për Evropë.

Një tjetër triumf të madh e ka arritur edhe Gjilani që e mposhti Ferizajn 1-2, për skuadrën e Debatik Currit kjo është fitore e rëndësishme e cila e inkuadron në garë për Evropë.

E vetmja sfidë që u mbyll baras ishte ajo mes Drenicës dhe Dukagjinit e cila u mbyll 2-2.

Pas 23 xhirove, Drita ka 42 pikë, Ballkani është i dyti me 39 sosh, Prishtina e treta me 37 aq sa ka edhe Malisheva. I pesti është Gjilani me 36 sosh.

Dukagjini ka mbetur i gjashti me 33 pikë. Llapi pas fitores i ka ikur pak zonës së rrezikshme ku ka 26 pikë, Ferizaj është i teti me 23, kurse në dy vendet e fundit janë Prishtina e Re me 22 pikë aq sa ka edhe Drenica.

Javën e ardhshme Drita luan me Ballkanin, Prishtina takohet me Prishtinën e Re, Malisheva përballet me Ferizajn, Gjilani është nikoqir i Drenicës dhe Dukagjini e pret në shtëpi Llapin./Arbresh.info